ਐ ਜਰਨੈਲ, ਤੇਰਾ ਟੈਂਕ

ਐ ਜਰਨੈਲ, ਤੇਰਾ ਟੈਂਕ ਬਹੁਤ ਤਾਕਤਵਰ ਹੈ

ਇਹ ਜੰਗਲ਼ ਪੱਧਰੇ ਕਰ ਸਕਦੈ

ਸੌਆਂ ਬੰਦੇ ਫੇਹ ਸਕਦੈ

ਪਰ ਇਹਦੇ ਵਿੱਚ ਇੱਕ ਨੁਕਸ ਹੈ:

ਇਹਨੂੰ ਚਲਾਉਣ ਵਾਸਤੇ ਡਰਾਈਵਰ ਚਾਹੀਦਾ ਹੈ।

ਐ ਜਰਨੈਲ, ਤੇਰਾ ਲੜਾਕਾ ਜਹਾਜ਼ ਬਹੁਤ ਤਾਕਤਵਰ ਹੈ

ਇਹ ਤੂਫ਼ਾਨਾਂ ਤੋਂ ਵੀ ਤੇਜ਼ ਚਲਦੈ

ਹਾਥੀ ਤੋਂ ਵੱਧ ਸਮਾਨ ਢੋ ਸਕਦੈ

ਪਰ ਇਹਦੇ ਵਿੱਚ ਇਕ ਨੁਕਸ ਹੈ:

ਇਹਨੂੰ ਚੱਲਦਾ ਰੱਖਣ ਵਾਸਤੇ ਮਕੈਨਿਕ ਚਾਹੀਦਾ ਹੈ

ਐ ਜਰਨੈਲ, ਬੰਦਾ ਬਹੁਤ ਕੰਮ ਦਾ ਹੁੰਦੈ

ਉੱਡ ਵੀ ਸਕਦੈ, ਉਡਾ ਵੀ ਸਕਦੈ

ਮਰ ਵੀ ਸਕਦੈ, ਮਾਰ ਵੀ ਸਕਦੈ

ਪਰ ਇਹਦੇ ਵਿੱਚ ਇਕ ਨੁਕਸ ਹੈ:

ਇਹ ਸੋਚ ਵੀ ਸਕਦਾ ਹੈ